DAVAO CITY – Nanginaut na lamang ang mga kaigsuonang Muslim sa probinsiya sa Davao Oriental nga mahatagan ug katumanan ang ilang pangandoy nga makatukod ug laing una nga pampublikong sementeryo sa mga Muslim sa lalawigan partikular na sa Mati City.
Kahinumduman nga nanawagan ang United Association of Datu and Imam (UNADIM), nga gilangkuban sa mga lideres gikan sa nagkadaiyang tribu sa mga Muslim ngadto sa lokal nga panggamhanan sa probinsiya nga planohan ang pagmugna ug public cemetery nga dugay na nila nga gipangandoy.
Atol sa gipahigayon nga dayalogo kauban ang Provincial Muslim Cemetery Task Force, gikanayon sa mga miyembro UNADIM, sa pagpanguna ni Datu Nestor Vicente nga ang maong proyekto usa sa mga solusyon sa suliran sa ilang komunidad kalabot sa tukma nga paglubong sa ilang mga minatay ingon man tukma nga pagpahigayon sa ilang burial rites ug mga tinuhoan.
Hinuon nahimong malampuson ang maong dayalogo nga gipangunahan ni Provincial Governor’s Office’s Chief of Staff Ednar Dayanghirang.
Kahinumduman nga una ng nagbaton kaniadto ug bangi kalabot sa ownership ug pagdumala sa maong sementeryo.
Apan gitino ni Sangguniang Panlalawigan Board Member Anacleto Macatabog nga head usab sa Provincial Muslim Cemetery Task Force, nga ang propedad nga gipanag-iyahan sa provincial government ang dumalaon lamang sa gobyerno.
