DAVAO CITY – Nagpakitabang ang pamilyang Espenosa sa dakbayan sa Tagum human nga naugdaw ang ilang balay sa sunog ug duha sab sa ilang mga anak ang nakabsan sa kinabuhi.
Kagahapon sa hapon nakabsan sa iyang kinabuhi si Laisa Mae Espenosa, samtang gitinguha nga maluwas sa mga doctor sa Regional Medical Center human makahi-agum ug third degree burn sa kalawasan.
Unang nabugtu-an sa iyang kinabuhi ang pito ka bulan pa lamang nga bata nga si Lara Mae Espenosa.
Gihaya ang duha sa punerarya sa dakbayan sa Tagum.
Migawas sa imbestigasyon sa Bureau of Fire Protection (BFP) nga posible nga nagdula ug posporo ang mga biktima dihang milakaw ang ilang amahan aron nga mopalit ug tambal alang sa mga samad niini human ma-haybol sa motor, samtang wala sab sa ilang pinoy-anan ang inahan tungod kay anaa sa trabaho.
Ang nahabilin na lamang sa mga anak sa pamilyang Espenosa mao sila si Laisa Jane, upat ka tuig ug Larry Espenosa, Jr., duha ka tuig pa lamang.
Ang duha naluwas sa mga silingan atol sa pag-ulbo sa kalayo sa Purok 9, Barangay San Miguel, Tagum City.
