DAVAO CITY – Hangtud karon walay kabutngan sa ilang kalipay ang pamilya ni Carlo Paalam, lumad nga taga Cagayan de oro sa nahimong kadaugan sa sangka niini sa milabay nga adlaw batok sa Olympian nga si Mohamed Flissi sa Algeria.
Sumala pa kang Mechelyn Paalam, igsuon ni Carlo mibati sab sila ug tumang kabalaka sa sangka niini gumikan kay usa sab ka professional boxer ang taga Algeria nga pipila ka higayon na sab sumala pa nga nakaatbang sa iyang igsuon.
Dugang sa nahisgutan nga proud sila kang Carlo sa nakab-ot niini ug mapasalamaton sila tungod kay gipanalanginan kini sa labaw’ng makagagahum.
Sumala ni Mechelyn nga dili lalim ang gi-agi-an sa iyang igsuon gumikan kay nahimo kini basurero hangtud nga mipailalom sa pagbansay ayha nahimong hingpit nga boksidor.
Nasayran sab sa nahisgutan nga kaniadtong bata pa sab ni Carlo, aduna na kini potensiyal sa natad sa boksing gumikan kay dili sumala pa kini mo-atras sa higayon nga makakita ug sumbagay.
Ugmang adlawa, makaatbang ni Carlo si Shakhobidin Zoirov sa Uzbekistan alang sa quarterfinals alas 10:15 sa buntag aron aduna pay tsansa sa medal round.
