DAVAO CITY – Gitino sa Davao City Police Office (DCPO) nga ila lamang gipailalom sa profiling ug gibuhian gilayon ang magti-ayon nga susama ug apelyido sa mga teroristang Maute human kini nababagan kagahapon sa checkpoint sa Sirawan Toril ning dakbayan sa Davao.
Sumala sa DCPO, sakay sumala pa sa ilang sakyanan ang magti-ayon kauban ang ilang mga paryente ug dihang mihatag sila ug ID, namatikdan sa mga otoridad nga Maute ang apelyido niini hinungdan nga ila una kini nga giimbetahan alang sa pipila ka mga pangutana.
Atol sa gihimo nga pagsukit-sukit, nasayran nga lumad nga taga Pu-ona Bayabao Lanao del Sur ang nahisgutan nga pamilya ug naka-eskwela sab ang ilang anak sa Mindanao State University (MSU) apan kasamtangan nga nagtungha sa UP Diliman.
Nasayran sab sa DCPO nga walay kalabutan ang mga nahisgutan sa terorista nga si Cayamora Maute hinungdan nga ila kining gihatagan ug Certificate of appearance nga mamahimo nila nga magamit aron nga malimpiyohan ang ilang ug apelyido nga mihatud sumala pa ug kahasol kanila matag mohatag sila ug ID sa mga checkpoint.
Nasayran nga miadto dinhi sa dakbayan ang nahisgutan nga pamilya aron personal sab nga klaruhon sa National Bureau of Investigation (NBI) nga wala silay relasyon sa mga teroristang Maute bisan nga pareho sila ug apelyido niini.
