DAVAO CITY- Andam na ang Dabawenya nga si Dr. Jimymah Coching, aron i-representa ang isla sa Mindanao partikular na ang dakbayan sa Dabaw alang sa ipahigayon nga Mrs. Universe Philippines 2024.
Gikanayon ni Coching kinsa usa ka Colon Hydro Therapist sulod na sa kapin 20 ka mga katuigan, nga bisan ug labing una pa niya nga higayon nga makasalmot sa ingon niini ka prestiyosong beauty pageant, positibo siyang maangkon ang kadaugan.
Sa mosunod nga mga adlaw sugdan na ni Dr. Coching ang iyang hinugtanay nga training partikular na ang mamahimo niining “iconic walk” atol sa pagrampa sa event proper karong taliabot nga Agosto 24 tuig kasamtangan sa Metro Manila.
Usa sa mamahimo niining adbokasiya mao ang pagtudlo sa katawhan unsaon pag atiman sa kaugalingon aron kanunay magbaton ug maayong panglawas ug malikay sa mga sakit.
Hugot ang paglaom ni Dr Coching nga maangkon ang dakong suporta gikan sa mga katawhan sa dakbayan sa Dabaw sa iyang pagsalmot sa Mrs. Universe Philippines 2024.
