Gibutyag sa Malakanyang nga “hearsay” kon haka-haka lamang ang gibatong akusasyon batok kang Pangulong Ferdinand Marcos Jr. Sumala ni Presidential Communications Office Acting Secretary Dave Gomez, walay tukmang basehan ug ebidensiya ang maong akusasyon.
Ang presidente mismo ang mipadayag sa tanang anomalya sa flood control diin mihimo siya og lakang aron ang mga responsable pasakaan og kaso.
Gawas pa niini, angay nga mabalik ang mga bahandi ug mahan-ay ang tanang sistema aron dili na kini ma-usab pa.
Gihagit usab niini si kanhing Ako Bicol Party-list Representative Zaldy Co nga mouli ug manumpa sa iyang mga alegasyon.
Kahinumdoman nga giakusahan ni Co ang Presidente ug ang iyang ig-agaw nga si kanhi Speaker Martin Romualdez, kauban ang pipila ka cabinet members, nga nagpasulod sumala pa og P100 bilyon gikan sa national budget.
.Sumala pa ni Co, nagsugod ang tanan niadtong 2024 sa dihang gitawagan matud pa siya ni Budget Secretary Mina Pangandaman taliwala sa BICAM deliberations.
Gibutyag sumala pa sa kalihim nga ang mando ipasulod ang ₱100 bilyong proyekto sa final version sa budget gikan mismo sa Presidente.
