Tapuson na ni Pangulong Ferdinand Marcos Jr. ang palakasan system sa mga proyekto sa farm-to-market roads (FMR).
Gibuhat ni Marcos ang maong pamahayag taliwala sa imbestigasyon nga gihimo sa gobyerno kabahin sa P105 milyon nga giingong “ghost projects” sa farm-to-market roads sa Mindanao.
Sa iyang pamahayag atol sa inagurasyon sa Union Water Impounding Dam sa Claveria, Cagayan, gibutyag sa Pangulo nga tanang proyekto sa FMR karon kinahanglan na nga mosunod sa usa ka national masterplan, imbes nga ipaagi sa political connections o mga kaalyado sa partido.
Dugang niya, dili na sama sa una nga ang mga proyekto ipasa lamang tungod sa palakasan, pagka-amigo, o pagka-kaalyado sa partido, bisan pa walay klarong plano.
Sumala pa sa Pangulo, gikonsulta na karon sa administrasyon ang mga gobernador ug mayor aron ma-validate ang roadmap sa FMR, aron masiguro nga ang mga proyekto base sa aktuwal nga panginahanglan, ug dili lang tungod sa political patronage.
Gipasalig sab sa Pangulo nga dili lang ang mga FMR ang pagatukan sa gobyerno, kundili apil usab ang mga tulay nga magsumpay sa mga uma ug merkado (farm-to-market bridges).
