Padayon karon ang gipahigayon nga imbistigasyon sa kapulisan mahitungod sa nahitabong pagpamusil kagahapon sa hapon sa Deca Homes, Brgy. Tacunan, Tugbok Dist. ning syudad sa Davao nga ang biktima usa ka langyaw nga gikan sa Pakistan.
Subay sa report sa kapulisan, dali nga gidala sa Davao Adventist Hospital ang biktima nga nailhan nga si Alfraz Ali, 29 anyos, usa ka negosyante nga residente sa Purok-14, Barangay Ula, Tugbok District, ning syudad sa Davao.
Sumala sa imbestigasyon sa kapulisan, gikan sa usa ka barber shop sa ilahang subdivision ang biktima.
Samtang anaa kini sulod sa sakyanan, kalit kining giduol sa duha ka mga armadong namotorsiklo ug mipusil sa biktima katulo ka higayon. Human sa pagpamusil dali usab nga misibat ang mga suspetsado padulong sa Brgy. Ula.
Samtang dali usab nga gitabangan ang biktima sa mga tawo nga anaa sa palibot niadtong tungura.
Sumala pa sa kapulisan, wala napuruhan ang biktima sanglit nakalikay kini sa tuo nga lingkuranan sa sakyanan human human iyahang namatikdan ang pagpusil kaniya.
Nakaangkon ang langyaw og duha ka samad sa likod ug sa wala nga bahin sa iyahang abaga.
Sa gihimong pagpanubay sa crime scene, narekober sa mga otoridad ang tulo ka basyo sa .45 pistol nga gipailawom na usab sa ballistic examination.
