Gitumong sa Pilipinas ug Japan nga usbon og pagtan-aw pag-usab ang pagtuon nga gihimo kaniadtong 2014 kabahin sa epekto sa kusog nga linog nga posible mogikan sa West Valley Fault.
Sumala ni Dr. Teresito Bacolcol, director sa Philippine Institute of Volcanology and Seismology (Phivolcs), giplano nga abrihan pag-usab ang maong pagtuon uban sa Japan International Cooperation Agency (JICA) sa sunod tuig.
Padayon ang ilang panag-istoryahanay ug naghulat na lamang sa pipila ka pirmahan.Matod niya, ang orihinal nga pagtuon, 20 ka tuig na ang milabay, ug sukad kaniadto, misamot pa ang kadaghan sa populasyon sa Metro Manila.
Ang maong pagtuon nga gisugdan pa kaniadtong 2004 gitawag og Metro Manila Earthquake Impact Reduction Study nga gipondohan sa Japan, ug naglakip sa risk assessment sa posibleng magnitude 7.2 nga linog gikan sa West Valley Fault.
Gipasidan-an ni Dr. Bacolcol nga kung molihok ang West Valley Fault, tibuok rehiyon makasinati og Intensity 8 nga pagtay-og, nga daku kaayong kadaot ang ikadalit.
Sa Metro Manila pa lamang, posibleng moabot sa 33,000 ang mamatay, ug posibleng mosaka pa sa 48,000 kung apilon ang ubang probinsya.
Gibana-banaan nga 114,000 ka mga tawo ang posibleng masamdan, base sa resulta sa naunang pagtuon.
Gilauman nga mahuman ang updated nga pagtuon sulod sa duha ka tuig, diin ang JICA ang mopondo sa proyekto, samtang ang Pilipinas ang motabang sa paghatag og datos ngadto sa ahensya.
