DAVAO CITY – Anaa na matud pa karon sa final stage ang gikanayon framework Agreement alang sa Samal Island-Davao City Connector Project (Davao-Samal Bridge) ug gikanayon sa Department of Public Works and Highways nga target sumala pa nga masugdan ang konstruksiyon niini sa second quarter sa 2022.
Una ng gibutyag ni Emil K. Sadain, DPWH undersecretary for Unified Project Management Office Operations ug chief implementer sa Flagship Projects under Build, Build, Build (BBB) Program, nga ang framework agreement andam na ug naghulat na lamang ug pirma sa Department of Finance (DOF) ug China Eximbank nga maoy mo-finance sa Davao-Samal Bridge project.
Sundan kini sa loan agreement signing aron porma na ang katukuran sa dugay ng gihandom nga tulay. Laoman sumala pa nga ablihan ang nahisgutan nga tulay pagsulod sa tuig 2026.
Gani nagpadayon pa sab karon ang DPWH official sa ilang gipahigayon nga negosasyon tali sa gobyerno ug mga nanag-iya ug propedad nga posibleng maapektohan sa proyekto.
Nasayran nga dinhi sa dakbayan sa Davao, anaa sa 18 ka mga propedad ang maapektahon sa higayon nga magsugod na ang proyekto.
Una ng nasayran kang National Economic and Development Authority (Neda)-Davao Director Maria Lourdes Lim nga ang Davao-Samal Bridge isumpay sa Samal Circumferential Road sa Barangay Limao sa Samal paingon dinhi sa dakbayan tali sa R. Castillo-Daang Maharlika junction nga adunay gitas-on nga 3.98 kilometers.
Ang nahisgutan nga proyekto gahinan ug pondo nga P23.04 billion.
Gibutyag sab sa DPWH nga gikan sa 199 ka mga infrastructure projects sa Duterte administration, 18 ka mga proyekto ang nakumpleto samtang 12 ka mga proyekto ang gikatakdang matapos ayha matapos ang kasamtangan nga tuig ug 89 projects ang makumpleto pagsulod sa 2023 kalakip na niini ang Davao-Samal Bridge.
