Mas sayo natapos ang deliberasyon sa budget sa Office of the Vice President (OVP) nga gihimo sa House Appropriations Panel.
Personal nga mitambong si Vice President Sara Duterte sa maong budget briefing aron depensahan ang ilang pondo para sa tuig 2026 nga nagkantidad og P902.895 milyon.
Si VP Sara mismo ang nagpresenta sa budget sa iyang opisina ug siya ra usab ang solong mitambong sa maong pagdinig, human niyang suguon ang uban niyang mga opisyal nga dili na molahutay aron malikayan ang trauma nga sama sa nahitabo sa miaging budget deliberation.
Alas-9:17 sa buntag, miabot si VP Sara sa Romualdez Hall ug gisugat siya ni Appropriations Panel Chair Rep. Mikaela Suansing ug sa budget sponsor nga si Palawan 2nd District Rep. Jose Alvarez.
Dili dugay ang deliberasyon sa OVP budget tungod kay gihatagan kini og parliamentary courtesy. Bisan pa niini, nakadawat gihapon si VP Sara og pipila ka pangutana gikan sa minority bloc.
Sa interpelasyon, wala niya gitubag ang isyu nga gipangutana ni ACT Teachers Partylist Rep. Antonio Tinio may kalabotan sa confidential funds.
Tubag ni VP Sara, dili siya makahatag og komento tungod kay adunay pending motion nga gihisgutan pa sa Korte Suprema. Ang gipangayo nga budget sa OVP para sa 2026 mas dako kumpara sa P733 milyon nga naaprubahan alang sa 2025.
