Gisugdan na kagahapong adlawa ang paghisgot sa sugyot pangnasud nga pondo alang sa 2025 pinaagi sa briefing sa Development Budget Coordination Committee (DBCC).
Gipangunahan ni Senate Committee on Finance Chairman Senadora Grace Poe ang diskusyon sa sugyot nga P6.352 trillion national budget alang sa mosunod nga tuig.
Present sa maong DBCC briefing ang mga opisyal gikan sa Department of Budget and Management, Department of Finance, National Economic and Development Authority, Office of the President, ug Bangko Sentral ng Pilipinas.
Sumala ni Senadora Poe nga ilahang siguraduhon ang transparency, accountability, ug prudent o makatarunganon nga paggamit og resources sa gobyerno.
Una na nga gipahibalo sa ni Poe nga ang pagtuki sa proposed national budget ang mahitabo hangtod Oktubre 18.
Sumala pa niini nga plano nila nga magpasa ang committee report sa 2025 national budget ug maaprubahan ni Pangulong Ferdinand Marcos Jr sa unang semana sa Disyembre.
Una nang gisiguro ni Senate President Francis ‘Chiz’ Escudero nga ang mga ahensya lamang nga nangunahanglan og confidential ug intelligence funds ang mahatagan niini.
Tungod sa election budget ang tukiong pondo, siguraduhon matud pa nila nga dili kini magamit sa kampanya sa mga kandidato.
Aduna matud pay balaod ug Comelec regulation ang nakalatid alang malikayang magamit ang pondo sa gobyerno sa kampanya sa kinsa mang kandidato.
