DAVAO CITY – Nabalaka ang militanteng grupong PASAKA nga subling modaghan ang mangamatay nga mga tribal leader ug mga yano nga mga lumad ang mangamatay labi na karon nga mitanyag ang kagamhanan ngadto sa mga lumad ug baynte mil ka pesos nga gante alang sa matag New People’ Army (NPA) nga mapatay.
Gipahayag ni Jong Munson, Secretary General sa grupong PASAKA Southern Mindanao Region (SMR) nga mas magkabangis pa ang mga Alamara ug mga Paramilitary sa ilang komunidad gumikan kay daw nahatagan sila ug lisensya sa pagpatay sa ilang mga isigka-tribu nga padayon nga nakigbisog alang sa ilang yutang kabilin.
Sa kwentada ni Munson anaa na sa traynta y tres ka mga lideres sa mga lumad ang napatay ilalaum lamang sa kagamhanang Duterte gumikan sa tumo-tumo ug mga pasangil nga mga NPA o mga nagasimpateya sa mga rebeldeng NPA.
Sa kasamtangan mas namiligro ang mga lumad, labi na kadtong mga aktibo sa kalihukan sa pagpanalipod sa ilang mga yutang kabilin ug nagapugong sa pagsulod sa mga dagku nga mga korporasyon sa ilang mga lugar, labi na karon nga duna na’y bugti nga dagku nga mga kantidad nga gihanyag ang kagamhanan.
