Gitala sa Davao City Business Bureau ang padayon nga pagtaas sa aplikasyon ug pag-renew sa business permit gikan sa tuig 2022 hangtod 2024. Ang business permit usa ka kinahanglanon nga dokumento alang sa mga negosyo nga mag-operate sa syudad. Sa 2022, nagtala ang Bureau og 49,935 nga aplikasyon, diin 44,935 ka permits ang na-issue, nga nagresulta sa kita nga P1,558,491,449.99.
Sa tuig 2023, nakarekord ang Business Bureau og 50,792 nga aplikasyon, ug 46,202 niini ang na-issue, nga naghatag og total revenue nga P1,856,681,319.56. Ang pagtaas sa aplikasyon nagpamatuod sa padayon nga pag-uswag sa ekonomiya sa syudad. Samtang sa 2024, ang aplikasyon sa business permit miabot sa 52,219, uban sa dakong pagtaas sa bag-ong aplikasyon nga nakaabot sa 6,496. Kini nga ihap mas dako pa kay sa mga bag-ong aplikasyon sa 2022 ug 2023, nga 168 ug 210 lang, subay sa datos.
Gipasabot ni Maribel Paguican, ang Ulo sa Business Bureau, nga ang padayon nga pagtaas sa aplikasyon ug renewal sa business permit nagpamatuod sa padayon nga paglambo sa ekonomiya sa Davao City. Dugang pa niya, ang pagtaas sa mga permit applications nagpasabot og dugang nga oportunidad sa trabaho ug maayo nga kompetisyon sa merkado, nga nakapauswag pa sa ekonomiya sa syudad.
