DAVAO CITY – Subling gipahinumduman sa Davao City COVID-19 Task Force ang mga Dabawenyos nga bugtong social distancing protocol lamang ang gitangtang apan nagpabilin pa gihapon ang pagsuot ug facemask.
Sumala pa kang Dr. Michelle Schlosser, tigpamaba sa Davao City COVID-19 Task Force, nga daghanan ang nagtoo nga gitapos na sab karun ang pagsuot ug facemask sanglit pipila sa mga information campaign signages ang nagkanayon nga gitapos na sa siyudad minimum public health standards (MPHS).
Sumala pa kang Schlosser, nga kung madakpan nga walay suot nga face mask sa mga pampublikong lugar, isyuhan gilayon kini ug citation tickets.
Kahinumduman nga sa first offense sa face mask ordinance sa siyudad mao ang pagpahamtang ug P500: P2,000 alang sa second offense; ug P5,000 o usa ka bulan nga pagkabilanggo.
Gawas sa pag-awhag sa mga Dabawenyos nga kanunay magsuot ug face masks sa public places, gi-mandoan sab ang tanan nga mga private ug public establishments nga magpahimutang ug mga senyales sama sa ‘No Mask, No Entry’ sulod sa mga bisinidad.
Nasayran nga nakatala na karun ang Prevention/Enforcement Cluster sa Davao City COVID-19 Task Force ug 426 face mask violators sa milabay nga Marso 14 hangtud 18, 2022.
