Nagpahibalo ang City Health Office (CHO) nga adunay 2,000 ka mga kaso sa tuberculosis (TB) ang natala sa Dakbayan sa Davao atol sa unang bahin sa 2025, hinungdan sa pagpakusog sa ilahang kampanya sa pagpangita og mga kaso sa tanang 182 ka barangay sa syudad.
Sumala ni Nikita Marie Jamiana, focal person sa TB program sa CHO, ang dakong ihap sa kaso resulta sa ilahang proactive nga pamaagi sa aktibong case detection. Gipasabot usab niini ang kamahinungdanon sa sayong pagdayagnos tungod ang dili ma-diagnose nga TB patient mahimong makatakod pa og hangtod 15 ka mga tawo.
Ang Barangay Buhangin ang adunay labing taas nga natalang kaso sa TB, gisundan sa Agdao ug Talomo South. Sa nakalabay nga report, gibutyag ni Jamiana nga misaka ang kaso sa TB sa syudad gikan sa 8,212 sa tuig 2023 ngadto sa 8,601 sa 2024. Samtang gipasalig usab niini nga adunay igo nga tambal sa TB nga libre ug magpabiling available pinaagi sa CHO, nga gisuportahan usab sa lokal nga kagamhanan aron masiguro nga makahatag og serbisyo sa mga nagkinahanglan og public health services.
Nasayran nga sukad pa sa Oktubre 2024, ang CHO misugod og pagbisita sa mga lagyong komunidad, uban sa koordinasyon sa mga opisyal sa barangay ug Sangguniang Kabataan (SK), aron pasabton ang publiko ug wagtangon ang mga sayop nga hunahuna kabahin sa TB. Ang mga lokal nga lider ginatudloan usab karon aron mahimong kauban sa serbisyo-medikal sa ilang tagsa-tagsa ka mga lugar.Alang karong tuiga, tumong sa CHO nga makaabot og serbisyo sa 57 ka mga barangay.
Lakip sa ilahang barangay health missions mao ang:Chest x-ray, Kilatis-kutis (skin screening)Laboratory tests ug Screening alang sa latent TB infection
