DAVAO CITY – Ipatuman na sugod ugmang adlawa ang Election Gun Ban, subay sa gipagulang COMELEC Resolution 10741. Suspendido na usab ang tanang Permit to Carry Firearms Outside of Residence kon PTCFOR sa mga sibilyan isip pagpangandam alang sa election season.
Mulungtad ang ban gikan Enero 9 hangtod Hunyo 8 ning tuiga.
Andam na sab ang PRO XI sa pagpatuman sa maong kamanduan sugod ugma. Matud ni PRO XI Spokesperson PMaj. Eudisan Gultiano, ang mga uniformed personnel lang ang tugutan nga magdala og mga armas, bisan pa man nga nakasuot sila og pangsibilyan nga sinina.
Tugutan lamang nga nakadisplay ang armas kung nakasuot og uniporme ang pulis, samtang kinahanglan concealed o nakatago kini kung naka pangsibliyan nga sinina.
Hinuon, giklaro sa opisyal nga PTCFOR lang ang apektado ug dili ang license for possession and ownership sa mga sibilyan sulod sa unom ka bulan nga ban. Sa mga kandidato nga buot magdala og armas alang sa ilang seguridad ang kinahanglan mag-apply sa buhatan sa COMELEC alang sa lisensya ug approval niini.
Dili magpanuko ang kapulisan nga dakpon ang mga musupak sa gun ban, ug posible pa silang mapasang-atan og kaso nga illegal possession of firearms.
Hugot nga bantayan sa usa ka special task force unit ang tanang election-related violations, lakip na sab ang pagbantay sa tanang border checkpoints sa rehiyon.
