Gikatala sa Davao City Police Office ang hapsay ug malinawong kasaulugan sa Pasko ug pagsugat sa bag-ong tuig, usa ka kalampusan isip mauswagong dakbayan.
Mapasilamaton usab si DCPO Acting City Director Pcol Hansel Marantan sa kapulisan ug sa kolaborasyon niini ngadto sa Davao City Security and Safety Clusters diin hingpit nga gitala ang zero report sa mga insidente nga dunay kalabutan sa pabuto ug susama sa mga iligal nga kalihukan atol sa kasaulugan.
Kahinumduman nga dul-an 26,000 ka mga personnel sa DCPO ang gi-deploy ngadto sa tagsa-tagsang field aron sa pagsagubang sa posibleng dili maayo nga insidente atol sa miabot og usa ka bulan nga Pasko Fiesta Culmination 2024.
Sa laing bahin, padayon usab ang lig-on nga pagsalig sa lokal nga panggamhanan ning dakbayan sa Davao ug mga ahensya sa law enforcement alang sa kaayuhan sa publiko.
Samtang nagmalinawon ang pagsaulog sa bag-ong tuig kagabii sa tibuok syudad sa Davao.
Subay sa report gikan sa Davao City Police Office sukad kagabii nga nagsugod ang mga aktibidad alang sa pagsugat sa Bag-ong tuig walay mga natala nga insidente sa kagubot ngadto sa mga kwerpo sa kapulisan.
Sa bahin sa mga kapulisan una ng gipasalig niini nga pabilin kining mag-alerto sa tibuok syudad alang sa kahapsay ug malinawon nga kasaulugan sa mga Dabawenyo.
Samtang namatikdan usab nga hawan ang mga karsada karong panahuna ug walay nagabayahe nga mga sakyanan sa mga nag-unang kadalanan dinhi sa dakbayan ilabi na sa pampasayroang sakyanan.
