Gikumpirma sa Department of Justice (DOJ) nga gipadayon na usab ang ilang “search and retrieval operations” sa Taal Lake.
Matod mismo ni Secretary Jesus Crispin Remulla, padayon na usab karon ang pagpangita sa mga awtoridad sa maong lawa.
Kini tungod sa kalit nga pag-igo ug gihatod nga kadaot sa habagat ug sa daut nga panahon nga resulta sa miaging mga bagyo.
Gipahayag sa kalihim nga balik na ang operasyon aron pangitaon ang giingong mga bukog sa mga nahanaw nga sabungero.
Gibutyag usab sa nahisgutan nga ang operasyon sa pagpangita ug pag-retrieve dili nila hingpit nga makontrolar tungod kay kinahanglan usab niini nga ikonsidera ang kahimtang sa panahon.
Gibutyag niini nga gihatagan nila og prioridad ang kaluwasan sa mga technical divers nga maoy nangulo sa pagsalom sa ilawom sa tubig sa lawa.
Samtang kabahin sa lawom nga imbestigasyon sa mga narecover sa Philippine Coast Guard, gikanayon ni Remulla nga dili kini angay dali-dalion.
Ilabi na ang DNA testing, diin ang mga narecover nga mga bukog moagi pa sa taas nga proseso aron matino ang resulta.
Plano sa kagawaran nga ipaubos sa DNA testing ang mga sample gikan sa mga kabanay sa mga nahanaw nga sabungero ug itandi kini sa mga resulta aron matino kung kini ba nagtugma nga mahimong gamiton isip ebidensya sa gipahigayong ‘case buildup’ sa DOJ.
Dugang pa, gipahibalo ni Secretary Remulla nga adunay bag-ong testigo nga gigunitan karon sa kagawaran.
Kini nga testigo, matod niya, makatabang sa pagpabakod sa kredibilidad sa miunang mitumaw nga testigo nga si alyas ‘Totoy’, nga ang tinuod nga pangalan mao si Julie ‘Dondon’ Patidongan.
