DAVAO CITY – Wala nakita nga problema si Davao City Mayor Inday Sara Duterte-Carpio kung buot sa mga residente dinhi sa dakbayan nga i-prenta ang ilang mga QR code gamit ang plastic material nga susama sa credit card.
Apan gibutyag sa Mayor nga kinahanglan dili mosobra sa P15 pesos ang singil niini.
Hinuon gitino niini nga dili sab kinahanglan nga i-prenta pa ang QR code basta kay i-save lamang kini sa cellphone ug kini ang ipakita pagsulod sa establisyemento o kung molatas sa mga checkpoint.
Wala sab sumala pay mamahimong problema sa privacy kung buot sa mga naghupot sa QR code na ipa-prenta kini ngadto sa uban nga tawo.
Kahinumduman nga gi-awhag ni Mayor ang mga dabawenyo nga mokuha na ug QR code gumikan kay sugod sa Nobyembre 7 mamahimong dakpon na ang wala naghupot niini ilabi na kung mo-agi sa mga checkpoint.
