Samtang padayon nga anaa sa bilangguan sa The Hague, Netherlands, gibutyag sa kampo ni kanhi Pangulong Rodrigo Duterte nga si Pangulong Ferdinand Marcos Jr. sumala pa ang anaa sa luyo sa pagpondo sa mga testigo batok kaniya sa International Criminal Court (ICC). Kini ang bag-ong anggulo nga gibutyag sa iyahang lead defense lawyer nga si Nicholas Kaufman.
Sumala sa abogado, nagpabiling positibo ang kanhi pangulo sa dagan sa iyang kaso bisan pa og adunay gibating sakit sulod sa Scheveningen Prison.
Samtang kabahin niini, nagduso na og pormal nga waiver si Duterte sa Pre-Trial Chamber (PTC)-I aron dili motambong sa hearing karong Biyernes nga maglantaw sa kahimtang sa iyang detensyon. Mibalibad usab siya nga moatubang bisan pinaagi sa videoconference.
Sa dokumentong iyahang gipirmahan, gibutyag ni Duterte nga bug-os ang iyahang pagsalig sa iyahang ICC legal team aron morepresenta kaniya sa maong pagdungog.
Hapit na mag-usa ka tuig nga nabilanggo ang kanhi pangulo human siya madakpan niadtong Marso 11 tungod sa tulo ka kaso sa crimes against humanity.
Nag-ugat ang kaso sa kamatayon sa 78 ka mga indibidwal atol sa iyahang kontrobersiyal nga war on drugs.
Kalabotan usab niini, gikatakda nga mopresenta og merito ang depensa karong hapon atol sa ika-tulo nga adlaw sa confirmation of charges hearing.
