Hugot nga gipanghimakak ni suspended Bamban, Tarlac Mayor Alice Guo nga gusto niining ipatumba sila si Senators Sherwin Gatchalian ug Risa Hontiveros gumikan sa illegal POGO ug citizenship.
Matod pa ni Atty. Stephen David, nahinabi niini sa cellphone si Mayor Guo aron pangayo-an ug reaksyon sa gisulti ni Gatchalian nga adunay death threat sa iyaha ang mayor.
Matod pa sa Mayor tanan na lamang gipasangil sa iyaha ug mas maayong ipatawag na lamang ang vlogger.
Dugang gipahayag sa Abogado nga negosyante ang mayor ug dili kini kriminal.
Kung kahinumduman nangayo ug panabang sa Pasay City Police si Gatchalian aron imbestigahan ang mikatag nga video sa online nga adunay paghulga sa iyaha ug kang Senador Hontiveros.
Sa sulat nga gipadala kang Police Major Paul Benjamin Mandate, Sub-Station Commander, gikanayon ni Gatchalian nga adunay hulga sa kinabuhi niini gumikan sa aktibong partisipasyon sa pagdungog sa Senado sa Philippine Offshore Gaming Operators (POGO) nga konektado kang Mayor Guo ug sa pamilya niini.
Samtang giawhag usab ni Senador Gatchalian si Mayor Guo nga mo-surrender na sa Senado gumikan kay maglisod kini sa pagtago ug dugay gumikan kay dili kini makagawas sa balay ug nasayod ang katawhan kung unsa ang hitsura niini ug si kinsa siya. Gipahayag ni Gatchalian nga posibleng mibiya na sa nasud si Guo ginamit ang Chinese passport.
Apan giklaro niini nga teorya lamang kini ug wala kini personal nga inpormasyon kung asa gayod si Mayor Guo.
