DAVAO CITY – Tugutan na sa lokal nga panggamhanan sa Dakbayan sa Davao ang pagpatuman og Home Isolation alang sa mga COVID-19-positive individual.
Taliwala kini sa pagkapuno-puno sa bed capacities sa Southern Philippines Medical Center ug sa uban pang COVID-19 referral hospitals sa Dakbayan.
Sumala kang Davao City Mayor Inday Sara Duterte-Carpio nga ginahulat na lang nila nga mapagula ang guidelines subay sa memorandum sa Department of Health ug Department of Interior and Local Government.
Nahisgutan na usab kini sa mga nagapangulo sa District Health Offices sa dakbayan, lakip na ang mga ipatumang household lockdowns sa mga panimalay nga dunay pagtakod-takod sa COVID-19.
Apan, giklaro sa Alkalde nga ang home isolation, alang lamang sa mga adunay mild COVID-19 symptoms.
Busa, dili kini applicable alang sa mga High Risk, Severe, ug Critical COVID-19 cases sanglit manginahanglan ang mga nahisgutan og atensyong medikal og oxygen.
Kahinumduman kaniadto nga wala nagpatuman og home isolation ang Dakbayan sa Davao.
Inay, ginadala dayon sa mga COVID-19 referral hospital o di kaha sa Temporary Treatment and Monitoring Facilities kon TTMF ang mga adunay mild symptoms sa COVID-19.
