DAVAO CITY – Gibutyag ni Capt. Rosario Aguilar, DCPO spokesperson nga mapasalamaton sila gumikan sa susporta nga gihatag kanila ni Archbishop Romulo Valles aron masiguro nga hapsay ang ipahigayon nga simbang gabi nga gikatakda na nga magsugod sa Disyembre 16 diin molungtad kini og siyam ka adlaw.
Una ng gibutyag sa Davao City Police Office (DCPO) nga ipatuman nila ang “one entrance policy” atol sa simbang gabi aron nga dili makapahimulos ang mga dautang elemento nga adunay dautan nga plano.
Una na sab nga nagpadala og mensahe ang arsobispo sa 39 ka mga simbahan sa siyudad aron nga suportahan ang one entrance policy sa kapulisan.
Gikanayong pinaagi sa maong lakang, usa ka gate lamang ang ablihan aron nga dali na lamang ang paghiling sa dalang mga bag sa mga manimbahay.
Samtang human usab ang santos nga misa, tanan nga mga gate ang ablihan na aron nga dali na lamang nga makagawas ang mga churchgoers sa simbahan.
Nagpahimangno ang kapulisan sa publiko nga idili sulod sa simbahan ang pagdala og backpacks, luggage ug uban pang mga dagko nga mga bags.
Dungan sa simbang gabi, tanan nga mga personahe ang i-deploy lakip na kadtong nadestino sa administrative section.
Samtang ang mga police stations adunay ipahimutang nga skeletal force aron maoy modawat og reklamo ingon man reports.
Sa bahin usab sa City Transport and Traffic Management Office (CTTMO) gibutyag sa ilang head nga si Dionesio Abude nga andam na sila kanunay dili lamang panahon sa Simbang gabi kung dili lakip na sa tibuok aktibidad nga kabahin sa Pasko Fiesta.
