DAVAO CITY – Kabahin sumala pa sa selebrasyon karon sa ika-80th Araw ng Dabaw ang pag-showcase sa nagkadaiyang kultura sa siyudad dili lamang sa mga lokal kung dili lakip na sa uban nga nasud. Matud pa kang Gene Rose Tecson, city tourism officer, ang dakbayan sa Davao usa sumala pa ka “melting pot” sa mga nagkadaiyang kultura.
Hinuon gitino sa opisyal nga kabahin pa gihapon sa kasaulogan ang nagkadaiyang tribu sa siyudad nga sagad mas nahatagan ug pagtagad panahon sa Kadayawan Festival.
Kahinumduman nga ipahigayon ang Cultural activities sama sa “Pasundayag sa Rizal Park” sa March 3-5 sa Rizal Park ning siyudad ug March 10-12, sugod alas sais sa gabii hangtud na sa alas dies.
Sa Marso 4, usa ka presentasyon ang ipasundayag sa Japanese community nga gikan sa Nikkei Jinkai ug Mindanao Kokosai Daigaku samtang ang Chinese cultural presentations ipahigayon sa Marso 5.
Gawas sa mga nahisgutan, makighiusa sab ang Indonesian Consulate sa Marso 10 ug mga Indian community sa Marso 12. Gitataw sab ni Tecson nga ang gi-andam nga mga performances mopakita sa kasaysayan sa dakbayan.
Samtang gilaoman sa city tourism office ang pagdagsa sa 150,000 local ug foreign visitors atol sa ikaduhang semana sa Marso o ayha ang Marso 16.
Samtang gikumpirma ni konsehal Al Ryan Alejandre sa Tourism, nga motambong si Pangulong Rodrigo Duterte sa mismong adlaw sa kasaulogan.
