DAVAO REGION- Target karon sa NBI XI nga mapasaka sunod bulan ang kaso ngadto sa korte sa duha hangtod sa tulo ka mga indibidwal nga nagpaluyo sumala pa sa pagproseso og gibuhat-buhatan nga late registered birth certificate sa Sta. Cruz, Davao Del Sur.
Kini ang gibutyag ni Regional Director Atty. Arcelito Albao, sa NBI XI, nga karon ginaplastar na sa ilahang buhatan ang mga dokumento ug mga ebidensya alang sa pagpasaka og kaso sa mga indibidwal.
Dugang sa opisyal nga kasong paglapas sa Republic Act 3019 Anti Graft and Corrupt Practices Act, Falsification of Public Documents under the revised penal code ang atubangon sa mga nahisgutan.
Dugang pa ni Albao nga lakip sa mapasakaan og kaso ang Municipal Civil Registrar sa Sta. Cruz, Davao Del Sur nga nakapirma sa mga binuhat-buhat kon falsified birth certificate. Samtang adunay duha sab ka mga clerk ang gikatakda sab nga pasakahan ug kaso.
Kahinumduman nga una ng gi-relieved sa katungdan ang mga nahisgutan tungod sa ilahang kalambigitan nga una na usab karon nga giimbistigahan sa LGU.
