DAVAO CITY – Muabot sa liboan ka mga tawo ang nagpahigayon og lihok-protesta nga gipangulohan sa Tagum City Chamber of Commerce and Industry kon TCCCI sa Rotary Park, Tagum City, Davao del Norte.
Atol sa natigayong lihok-protesta kagahapon, gipanawagan gihapon kini sa libuan ka mga kunsumante nga ilisdan na ang pagdumala sa Northern Davao Electric Cooperative Incorporated kon NORDECO gumikan sa taas nga presyo apan wala matud pa klaro ang serbisyo.
Pamaagi usab kini sa maong grupo aron manawagan sa publiko nga suportahan kauban sila ang gisang-at nga duha ka balaodnon sa Kongreso nga mao ang House Bill 5077 ug House Bill 6740 nga nagtumong na hulipan ang NORDECO ngadto sa barato ug mas-maayung kalidad nga serbisyo sa kuryente.
Gawas niana, hingpit usab gisuportahan ni Davao Del Norte Gobernador Edwin Jubahib ang maong lihok protesta. Matud sa gobernador nga iyang nasabtan ang mga aligot-got sa mga konsumante ug epekto niini pag-abot sa ilang adlaw-adlaw nga panginabuhian gumikan sa taas nga pagpasingil sa kooperatiba.
Sa presscon nga gipahigayon kagahapon, gikanayon sa legal counsel sa NORDECO nga si David Campoamor, “unconstitutional” ang mga sugyot balaudnon nga gipasaka karon sa mga kongresista nga ihatag sa Davao Light and Power Company ang franchise area sa NORDECO sa ubang bahin sa probinsya.
Nanghinaot ang legal team sa NORDECO nga hingpit nang ibasura ang mga balaudnon nga magpalugway sa DLPC franchise sa probinsya ug pasagdan na lamang silang makaoperate isip kooperatiba ug korporasyon nga gipadagan sab sa ilang mga myembro.
via || Bombo HJR & Bombo LJF
