DAVAO CITY – Gibarugan sa Interfacing Development Intervention for Sustainability kon IDIS nga angayng manubag sa mga kakulian nga nahitabo human sa natigayong landslide sa Zone 1, Barangay Masara, Maco, Davao de Oro.
Atol sa pakighinabi sa Bombo Radyo Davao kang Lemuel Manalo, program coordinator sa IDIS, giisa-isa niini nga ang mining company, ang lokal nga panggamhanan ug ang national government ang nangunay sa pagpaaktibo sa malambuon apan makaluluoy nga industriya sa pagmina, dili lamang sa pipila ka mga dapit sa Davao de Oro kon dili sa daghanang bahin sa nasud.
Pag-angkon ni Manalo nga epekto kini sa wa naamyendahan nga Republic Act No. 7942 kon Philippine Mining Act of 1995 ug ang matud pa huyang nga pagpahugot sa mga ordinansa sa LGUs alang sa mga trabahante ug mga residente nga nagpuyo duol sa minahang partikular na sa Barangay Masara.
Gipunting sab sa opisyal ngadto sa LGUs nga magmugna daan og mga mitigating ug preventive measures aron wala nay mga makalas nga kinabuhi sa bisan unsang mga katalagman sama sa landslide ug flashfloods.
Gimahayan sab sa environmental group ang sumala pa wala naasikaso nga mga lakang alang sa pagpahikiling sa mga nahimuyo sa natural hazard area sama sa nahitabo sa Barangay Masara.
Gisugyot sab ni Manalo nga mas maayo nga pakusgan ang mga local ordinances mahitungod sa pagbutang og mga no-build zones duol sa mga mining areas sa probinsya.
Tubag kini sa gikasugyot ni Office of Civil Defense XI director Ednar Dayanghirang nga maghimo og national ordinance alang sa mga geohazard areas.
Kahinumduman nga nagpagawas ang Mines and Geosciences Bureau-Region 11 og geohazard mapping niadtong 2011 ug 2014, diin gidili ang pagtukod og mga balay ug gambalay sa lugar gumikan giklasipika kining landslide prone area.
Dugang pang sugyot sa grupo nga mas maayong magagagikan sa national government ang mga kamanduan sa pagbawal nga mahimuyo sa mga delikadong dapit sama sa Taal Volcano.
Nagkanayon sab ang opisyal nga ang nahitabo sa Barangay Masara, Maco ang unta makapamatngon sa LGU alang sa pagmugna og maayong programa alang sa disaster awareness ug pagdumala alang sa kaayuhan sa mga residente.
Sa pagtapos sa search, rescue and retrieval operations ning milabayng adlaw, anaa sa 98 ang gikatalang nakabsan sa kinabuhi sa nahitabong landslide sa Zone 1, Barangay Masara, Maco, Davao de Oro.
