DAVAO CITY – Gikumpirma sa Department of Public Works and Highways Unified Project Management Office kon DPWH-UPMO nga nagsugod ang pagpananom og kahoy sa miaging tuig isip pagpangandam sa mga kalihokan sa pagputol sa kahoy alang sa Samal Island-Davao City Connector kon SIDC Project.
Sumala ni DPWH UPMO Bridges Management Cluster project director Rodrigo Delos Reyes, gitanom sa ahensya ang 22,500 ka punoan sa Marilog District ug Paquibato District sa Davao City, ug 8,500 ka punoan sa Ecopark Site, Sampao, Brgy. Mambago-A, IGaCoS.
Nasayran nga gihimo ang mga kalihokan sa pagpananom og kahoy sa wala pa ang kalihokan sa pagputol sa kahoy niadtong Marso 2024, isip kabahin sa pagpatuman sa mga kondisyon sa Environmental Compliance Certificate (ECC) ug pagsunod sa kondisyon sa permiso sa Department of Environmental and Natural Resources-City Environment and Natural Resources kon DENR-CENRO sa pagputol sa kahoy.
Dugang pa nga nihimo ang ahensya og mga tree-cutting activities sa Lanang, Davao City, ug Brgy. Limao, Island Garden City of Samal (IGaCoS).
Kahinumduman nga nagpatunghag mga kabalaka ang Sustainable Davao Movement (SDM) bahin sa panahon sa mga kalihokan sa pagputol sa kahoy ug ang paglapas sa Heritage Tree Ordinance, nga nanalipod sa mga hamtong nga kahoy nga naghatag og landong, makapabugnaw, ug makapamenos sa temperatura, partikular na sa centennial trees sa Davao City.
Gimanduan ang ahensya sa pagsunod sa mga lagda ug balaod nga nagdumala sa mga proyekto sa imprastraktura sa gobyerno ug magpabilin sulod sa iyang hurisdiksyon.
via || Bombo LJF
