DAVAO CITY – Padayon nga gi-imbestigahan sa Tagum Police Station kung si kinsa ang mipaluyo sa pagpusil sa usa ka negosyante kagabie sa Malinawon Homes, Magugpo East, Tagum.
Sa inisyal nga imbestigasyon sa otoridad, nag-internet lamang ang biktima nga nailang si Libra Quilat sa iyang tindahan dihang kalit na lamang nga mibutho ang armadong nga lalaki ug gipusil ang nahisgutan nga maoy hinungdan sa iyang pagkahagba.
Dali pa kini nga gidala sa balay tambalanan apan nakutloan kini sa iyang hinulaman nga kinabuhi. Human ang insidente, paspas sab nga misibat ang suspetsado sa wala matino nga direksiyon.
Gipalawman sab karon sa otoridad ang ilang pagpanubay aron nga masayran ang motibo sa krimen. Hinanali nga hustisya ang gipangayo karon sa kabanay sa biktima.
Gipasalig sab sa Tagum PNP nga panubayan nila ang krimen ug gilayon nga pasakahan ug kaso ang mga responsable niini.
