Gipadayag ni Department of Justice (DOJ) Secretary Jesus Crispin “Boying” Remulla nga si Elakim Patidongan, igsoon ni Julie “Dondon” Patidongan, personal nga nakasaksi sa pagpatay sa 10 ka missing sabungeros gikan sa Sta. Cruz ug Lipa, Batangas.
Sumala pa ni Sec. Remulla nga dako ug kabug-aton ang testimonya ni Elakim, tungod kay siya mismo ang nakakita sa insidente.
Dugang pa ni Remulla nga ang nahisgutan maisip nga direct witness siya ug kini ang lig-on ug credible.
Gibutyag usab nga kaniadto, nag-apply og cyber warrant ang CIDG sa BDO tungod sa ATM transaction sa usa sa mga nahanaw nga sabungero.
Wala pa mailhi ang tawo hangtod gipaila ni Dondon Patidongan nga mao kadto ang iyahang igsoon nga si Elakim, base sa CCTV footage.
Nahatagan og fake passport si Elakim ug gipatago pa daw ni Charlie “Atong” Ang sa Cambodia.
Sumala pa usab ni Remulla nga ilahang gpabalik gayud sa Pilipinas ang nahisgutan aron kini makapamatuod.
Sa pagkakaron, nagtrabaho ang DOJ aron makuha pa ang testimonya sa laing testigo. Gisiguro ni Remulla nga adunay pa gyuy mogawas nga dugang impormasyon sa husto nga panahon.
Gipasa na usab ni Julie ug Elakim Patidongan ang ilang mga affidavit.
Bisan pa nga konektado si alias Totoy sa krimen, giangkon sa DOJ nga lisod ug sensitibo ang kaso.
