DAVAO CITY – Gipaspasan na matud pa karun sa lokal nga kagamhanan ang pagpalit ug daghanan pa coronavirus disease (Covid-19) vaccines aron nga mahatagan ug kapili-an ang mga residente kung unsa ang gusto nila nga bakuna.
Kahinumduman nga una ng gipahimangnoan sa Davao City Covid-19 Task force ang katawhan nga dili na mamili ug Pfizer-BioNTech vaccines, gumikan kay gina-reserba kini sa pediatric vaccination sanglit kini lamang ang bakuna sa kasamtangan nga adunay Emergency Use Authorization alang sa mga minor de edad.
Bisan tuod nga available karon sa dakbayan ang tanan nga brand sa bakuna, apan padayon matud pa karon nga nagpalit ug dugang niini ang dakbayan.
Una ng gibutyag ni Davao City Mayor Inday Sara Duterte-Carpio nga as of January 24, anaa na 1,226,505 Dabawenyos o 94.35 percent sa target nga herd immunity ang fully vaccinated, samtang 1,280,467 o 98 percent ang naka first dose.
Mikabat na sab 154,267 ka mga indibidwal o 11.87 percent ang nabakunahan na sab ug booster dose.
