DAVAO CITY – Gipailalom sa otopsiya ang patay’ng lawas sa usa ka pulis nga nailang si patrolman Police Officer 1 Pat Nonie Lad Badbadon nga gikanayong nagpakamatay pinaagi sa pagpusil sa iyang ulo.
Kahinumduman nga nakaplagan na lamang nga wala nay kinabuhi si Badbadon sulod sa iyang lawak sa kwarter sa 1st Davao Oriental Police Mobile Force Company (DOPMFC) sa Barangay San Ignacio, Manay Davao oriental nga naligo sa kaugalingong dugo kagahapong adlawa.
Sa ulahing imbestigasyon sa sa Scene of the Crime Operatives (Soco) ug Manay Municipal Police Station, posibleng nagpakamatay ang biktima gumikan kay walay nakitang foul play sa krimen.
Una na sab nga gibutyag sa kabanay sa biktima nga dili sila motuo nga nagpakamatay si Badbadon gumikan kay wala sumala pa kini problema, walay hinigugma ug nagabasa pa ug bibliya.
Gani plano sumala pa sa biktima nga mamahimong usa ka pastor hinungdan nga dili sila makatuo sa gidangatan niini.
Gikanayong gihuptan pa sa biktima ang .9mm isyu nga maoy gigamit pagpusil sa iyang ulo.
Sumala pa kang Police Major Regalado, usa ka igo lamang sa ulo ang gikamatay sa biktima.
Nasayran nga gikan sa Sta. Ana Police station dinhi sa siyudad ang Badbadon ayha kini gibalhin sa kampo sa 1st DOPMFC, ilalom sa Manay Municipal Police Station.
