DAVAO CITY – Hugtanon una karon nga idili sa lalawigan sa Davao de Oro ang pagpahigayon ug mga meetings ingon man panagtapok sa mga tawo human nga natala sa lugar ang duruha ka kaso sa bag-ong variant sa Sars-CoV-2.
Una niini, gipasalig karon sa provincial government ang kaluwasan sa mga residente apan kinahanglan motamud sab ang mga nahisgutan sa mga polisiya.
Sa kasamtangan, dili pa mabutyag sa lalawigan kung kinahanglan magpatuman sila ug mas hugtanon nga mga sumbanan human nga kalakip ang ilang lugar sa mga gipailalom sa modified general community quarantine.
Sa kasamtangan, wala pa sab gibutyag sa Department of Health (DOH) kung taga asa ang usa pa ka pasyente nga nagpositibo sa bag-ong kaso sa virus nga natala sa Davao region.
Tungod niini, gilayon nga nagpatawag ang DOH-Davao ug emergency meeting sa mga concerned local government units.
Gipahugtan na sab karon ang gipahigayon nga contact tracing ngadto sa mga nakahimamat sa mga pasyente diin himuon kini hangtud sa third degree. Ang B.1.1.7 variant sa Sars-CoV-2, mao ang kagaw nga hinungdan sa coronavirus disease 2019 (Covid-19) diin una kini nga natala sa United Kingdom.
