DAVAO CITY – Hapsay ang unang adlaw sa pagpahigayon og face-to-face classes sa Faith International Academy of Davao City, Incorporated kagahapong adlawa.
Ang maong tunghaan usab ang nag-inusarang private school sa Davao Region nga gitugutan nga magpahigayon sa pisikal nga klase sanglit compliant kini sa mga requirement sa National Task Force Against COVID-19 ug Department of Education alang niini.
Ang mga estudyante lang usab sa Kinder hangtod Grade 3 ang misalmot sa klase. Gipatuman usab sa mga magtutudlo ang physical distancing sa mga estudyante ug ang pag-obserba sa uban pang health protocols sama sa pagsul-ob og face masks.
Half-day lang ang ilang mga klase matag adlaw, nga mulungtad hangtod Enero 31 sa musunod nga tuig.
Ginatun-an pa sa DepEd kung duna pa bay uban pang mga pribadong tunghaan sa Davao Region nga mamahimo nang tugutan nga magpahigayon og face-to-face classes.
Kahinumduman nga duha ka pribadong tulunghaan sa Davao Region ang girekomenda sa DepEd alang sa physical classes.
Una na sab nga nakapahigayon og in-person nga klase ang walo ka mga pangpublikong eskwelahan sa Davao del Sur ug Davao de Oro niadtong Nobyembre 15.
