DAVAO CITY – Gihatag na ang GO signal sa lokal nga panggamhanan sa Davao City alang sa pagpahigayon ug cockfighting kon sabong.
Gikabutyag ni Councilor Jessica M. Bonguyan, Committee on Games and Amusement chairperson, nga nagsugod na ug dawat ang opisina sa mga aplikasyon alang sa magpahigayon og derby sa dakbayan ilabi nang naghinapit na sab ang Araw ng Dabaw karong Marso.
Gipasibaw sab sa konsehal nga kinahanglang hatagan ug oras ang pagparehistro sulod sa 30 ka adlaw una pa mahitabo ang sabong. Sa pagkakaron, duha ka mga derby events ang aprubado na ug gikatakdang ipahigayon atol sa Araw ng Dabaw.
Gikanayon sab ni Councilor Bonguyan nga ila nang gilugway sugod pa kaniadtong Disyembre ang mga mamahimong kabag-ugan sa pagpahigayon ug sabong sa dakbayan kon diin sistematiko na ang entry sa mga sabungero ug manalpakay.
Magbutang na og mga QR codes sulod sa sabungan lakip na tickets aron makakolekta sab ug revenue ang panggamhanan gikan sa mga ipahigayong sabong.
Gipaniguro sab ni Bonguyan nga lugwayan sab ang mamahimong lakat sa trapiko sa mga sabungan partikular na sa New Matina Galleria, ning dakbayan, inubanan sa tabang sa CDRRMO.
via || Bombo LJF
