DAVAO CITY – Gipaklaro sa Police Regional Office 11 nga ang sunod-sunod nga insidente sa pagpanglugos ug pagpatay nga nahitabo sa Tagum City, Davao del Norte ang nagtukmod sa pagpapuli sa bag-ong Chief of Police sa maong syudad.
Sumala kang PMaj. Eudisan Gultiano, ang tigpamaba sa PRO 11, gumikan kana sa gipatumang One Strike Policy nga direktiba alang sa tanang kapulisan sa rehiyon nga kon ugaling dunay mga kriminalidad nga wala pa naresolba, adunay katungod ang PRO 11 nga papahawaon sa pwesto ang si bisan kinsang nangulo sa kapulisan sa lugar.
Sa kaso sa Tagum City Police, nakaapekto sa ilang operasyon sa peace and security ang mga nahitabong kamatayon sa duha ka babaye atol sa managlahing insidente sa syudad.
Dugang pa, ilang gilauman ang kapulisan nga resolbahon ang mga nahitabong kaso sa hinaling panahon nga matud pa, usa ka dagkong leksyon alang sa ubang commanders sa tibuok rehiyon.
Sa pikas bahin, gikabutyag ni PMaj. Gulitiano nga usa ka kaso sa miscommunication ang nahitabo tali sa PRO 11 ug Tagum City Mayor Rey Uy nga nagresulta sa temporaryong pagputol sa suporta sa LGU ngadto sa kapulisan.
Sumala pa, adunay kalambigitan ang LGU sa operasyon sa ilang kapulisan apan maanaa gihapon sa regional director sa PRO 11 ang pagpili sa mamahimong manguna sa tagsa-tagsa ka mga area of responsibility.
Dili intensyon sa ilang buhatan ang nahimong aksyon, busa nanghinaot sila nga mahan-ay na ang ilang mga ipatumang lakang sa seguridad human sa paghusay sa duha ka partido.
via || Bombo LJF
