DAVAO CITY – Isip pagpangandam sa hapit na usab nga pagbalik sa klase sa mga estudyante, target karon sa Davao City COVID-19 Task Force nga pakusgan pa ang pagbakuna sa mga kabatan-onan pinaagi sa pagdala niini sa mga tulonghaan.
Kahinumduman nga una nang gi-anunsyo sa Department of Education nga opisyal nga magsugod ang school year 2022-2023 sunod bulan, Agosto 22, 2022 samtang sa Nobyembre 2 usab hingpit nga sugdan ang 100% implementation sa face to face classes diin tanang mga estudyanteng mag-enroll alang sa umaabot nga school year ang required na nga muadto sa tulonghaan.
Sumala ni Dr. Michelle Schlosser, tigpamaba sa Davao City COVID-19 Task Force, nga gawas sa mga elementary students, target sab karon sa panggamhanan nga magpahigayon og pagbakuna sa mga pampubliko ug pribadong tulonghaan ning dakbayan lakip na sab sa mga pang-kolehiyong tulonghaan.
Nasayran nga una na sab nga nakiglambigit karon ang Vaccination Cluster ngadto sa Commission on Higher Education aron nga hingpit mapatuman ang maong plano.
BY BOMBO ALLIANE SILAO
