DAVAO CITY – Giprayoridad sa Davao City Public Safety and Security Office (PSSO) ang Close Circuit Television (CCTV) alang sa implementasyon sa kasadpan, amihanan, ug habagatan nga mga dapit sa Davao City.
Gibutyag ni PSSO Head Angel Sumagaysay ang ilang pagsumite sa ipatuman nga Comprehensive CCTV plan, nga usa ka dakong proyekto sa imprastraktura inubanan sa pakig-alayon sa City Mayor’s Office ug ubang mga buhatan sa lokal nga kagamhanan.
Sa pagkakaron, mokabat sa 100 ka CCTV cameras ang nabutang sulod sa siyudad, apan upat ang non-operational tungod sa mga factor nga dili makontrol sa buhatan.
Gipaneguro sa buhatan nga “ICT-ready” ang mga lugar sama sa bag-ong giablihan nga unang bahin sa Coastal Road aron mas sayon ang pag-instalar.
Giduso usab sa buhatan ang pag-amendar sa ordinansa sa dakbayan aron mapaayo ang CCTV footage sa mga establisemento ug magtakda og standard requirements sa pag-mount niini nga mga camera.
Dugang pa sa opisyal, ilabihang makatabang ang pagsunod sa mga sumbanan sa pagkuha sa tin-aw nga footage sa camera alang sa law enforcement alang sa mga imbestigasyon sa krimen.
Ang amendment nagsugyot usab og probisyon alang sa mga establisemento nga tugotan ang mga law enforcers nga maka-access sa ilang mga rekording sa CCTV.
Gihatagan og gibug-aton ni Sumagaysay ang kamahinungdanon sa oras sa pag-implementar sa CCTV, tungod kay kini makapauswag sa kahusayan sa pagpatuman sa balaod sa syudad.
via || Bombo LJF
