Giaprubahan sa Department of Budget and Management (DBM) ang pagmugna sa 178 ka mga bag-ong Public Attorney (PA) positions sa tibuok nasud aron pakusgan ang access sa hustisya ug paghatod sa legal nga serbisyo sa publiko.
Anaa sa 56 PA ll ug 122 PA l ug posisyon ang gimugna sa Public Attorney’s Office (PAO) ubos sa Department of Justice nga manginahanglan ug mukabat sa P336 milyon matag tuig, subay na usab sa DBM.
Gitahasan sa Section 3 sa Republic Act 9406 ang PAO nga muhatag ug libreng legal representation , assistance ug counseling sa indigent individuals sa criminal, civil, labor, administrative ug uban pang quasi-judicial cases. Mas matubag sa PAO ang mga dugang posisyon gumikan sa kusog nga demand sa legal representation ug serbisyo sa nasud.
Subay sa datos sa PAO, gihuptan sa ahensya ang mukabat sa 787,124 ka mga kaso ug gi-abagan ang 849,914 ka mga kliyente niadtong 2021. Niadtong 2022, misaka ang nahisgutang ihap sa 850,753 ka mga kaso ug 900,079 ka mga kliyente.
