DAVAO CITY – Padayon nga nakig-alayon ang kapolisan sa rehiyon unse ngadto sa kasundalohan aron sa pagluwas sa police nga si SPO2 George Rupinta nga gidagit sa mga rebeldeng NPA niadtong Hunyo 10.
Sumala pa kang Police Senior Inspector Catherine Dela Rey, tigpamaba sa Police Regional Office Eleven nga mga sakop sa 6th Pulang Bagani Company ug ang Guirrila Front 18 ang midagit kang Rupinta nga sakop sa Lupon Municipal Police Station. Una nang gikondena sa kapolisan ang nahisgutan nga pagpangdagit.
Sumala pa kang Regoberto Sanchez, tigpamaba sa NPA Southern Mindanao nga gidagit nila si Rupinta gumikan kay gi-reklamo kini nga nahilambigit sa Anti-People Activities.
Apan sumala pa kang Dela Rey nga wala mahilambigit sa bisan unsa nga pagpangabuso ang biktima, subay sa pagkompirma sa hepe niini nga si Police Chief Inspector Miguelito Cabahug.
Katapusan nga nakita si Rupinta nga nagmaneho sa iyang motorsiklo niadtong Hunyo 9, apan niadtong Hunyo 10 nakuta na lamang ang motor niini sa Purok Rosas, Barangay Langka, sa lungsod sa Lupon.
