DAVAO CITY – Bisan nga adunay gipahimutang nga advisory nga sugod karung adlawa ang temporaryo nga pagpasara sa Bolton Bridge, gikanayon sa City Transport and Traffic Management Office (CTTMO) pinaagi sa ilang head nga si Dionesio Abude nga sa Biyernes na lamang, Marso 18 sugdan ang pagpatuman niini.
Kahinumduman nga usa ka bulan nga ipatuman ang rehabilitasyon sa nahisgutan nga tulay aron masiguro ang kalig-on sa pundasyon niini human ang nahitabong sunog kaniadtong bulan sa Enero sa mga pinuy-anan nga nahimutang sa ilalom nga bahin niini.
Karun pa lang, nangayo na ug pagsabot ang ahensiya sa Department of Public Works and Highways (DPWH)-11 sa posibleng paghuot sa dagan sa trapiko sa nahisgutan nga area sa musunod nga mga adlaw sanglit usa ka tulay na lamang ang mamahimong maagi-an.
Apan gikanayon ni DPWH spokesperson Dean Ortiz nga aduna sumala pay pipila ka mga alternatibong rota nga mamahimong maagi-an nga gilangkuban sa J.P. Laurel Avenue, Quirino Avenue paingon sa Mc Arthur Highway; G. Torres St. Sandawa, dayon Generoso Bridge ngadto na sa Quirino Avenue; C.P. Garcia o J.P. Laurel, Quirino Avenue padulong sa Mc. Arthur Highway ug C. P. Garcia Highway ingon man Mc Arthur Highway.
Magsugod ang pagkumpuni sa tulay karung biyernes ug lauman nga matapos kini sa Abril 18, 2022.
