DAVAO CITY – Gimanduan na ni Davao City Mayor Inday Sarah Duterte-Carpio ang Davao City Police Office (DCPO) nga imbestigahan ang sumala pa pangulata sa duha ka pulis sa tulo ka menor de-edad.
Sa higayon nga mapamatud-an nga dunay bayolasyon sila si PO1 Jovanie Natividad ug PO1 Jesre Masinading kasohan kini ug kriminal.
Matud pa sa mayor nga bag-o pa lamang siya masayod sa maong balita human nga gisugilon kaniya sa iyang kaubanang abogado karong semanaha.
Kahinumdoman nga nahitabo kini niadtong Enero 21 nga kung diin nangdakpan ang tulo ka menor alas 12 sa tungang gabii.
Notadong badlongon sa katilingban sumala pa ang mga dinakpan. Nakurat ug wala katoo ang mayor sa nahimong batasan sa duha ka pulis nga kung diin makita sa CCTV ang gihimong pagbunal niini sa lapa-lapa sa usa ka menor ug pagduslak sa tiyan sa usa ug gipapangayo pa ug pasaylo kang Pangulong Rodrigo Duterte pinaagi sa hulagway sa presidente.
Naglaum na lamang si mayor Inday nga aksiyonan kini sa Davao City Police Office nga sakto alang sa maong reklamo bisan paman ug ang mga menor nakasupak sa balaud.
Gipasidan-an usab ni Mayor Inday ang mga pulis nga bisan ang mga menor de edad nga naghimo sa mga krimen kinahanglan nga ibutang sa kustodiya, ang pwersa dili angay gamiton batok kanila gawas lamang kung nabutang sa makuyaw ang ilang kinabuhi tungod sa aksyon sa mga menor de edad.
