DAVAO CITY – Gisuta na karon sa kapolisan kung biktima sa krimin ang lalaki nga dugta na nga nakaplagan sa stockroom sa gi-demolis nga NCCC Mall sa Maa, ning dakbayan sa Davao.
Sumala pa kang PCI Ronald Lao, hepe sa Talomo Police Station nga nasuta sa pag-autopsiya nga kapin duha ka semana pa lamang nga napatay ang biktima ug daw natabontabonan ug mga plato.
Una nang mi-reklamo ang kapolisan gumikan kay gihipus ang patay nga lawas sa biktima ug gisulod sa ice box nga wala maproseso sa Scene of the Crime Operatives (SOCO).
Gumikan niini gitataw sa mga tinugyanan sa balaod nga dili kalakip ang biktima sa sunog sa NCCC Mall. Sul-ob sa biktima ang pula nga polo shirt, maong nga pantaloon, ug relo nga silver ang kolor.
Kalabira na ang ulo sa biktima apan ang lawas niini duna pa’y unod-unod.
Sumala pa kang PCI Lao nga ginasuta nila sa pagkakaron kung kalakip mang biktima sa mga gi-hire nga mga trabahante alang sa pag-demolis sa mall, diin sumala pa ang kadaghanan taga-Manila.
Kahinumduman nga sa unang hugna sa demolisyon nahitabo ang paghilabot sa mga wala masunog nga mga produkto sa Mall.
