DAVAO CITY- Gilauman na sa usa ka political analyst ang pagkatag sa mga isyu ug fake news karong panahona, hilabi pa nga nagkaduol na nga eleksyon.
Sumala pa ni Political Analyst Ramon Beleno III nga ang maong mga pagpangdaot ang naandan na nga stratehiya sa pipila ka mga opisyal sa nasud rason nga mas gikinahanglan karon ang pag-igmat sa publiko.
Subli niining gipahinumduman ang katawhan sa pag-verify una sa tanang makita online bago paman kini tuohan ug dayong ipakatag hilabi pa sa hisgutanang teknolohiya karong panahona.
Kahinumduman nga ayha paman ang SONA ni PBBM kaniadtong nakalabyang adlaw, paspas nga mikatag ang video sa usa ka lalaki online nga matud pa si PBBM kinsa nisinghot og illegal nga droga.
Hinoon, nihatag na og katin-awan ang mga otoridad kalabot sa maong alegasyon ug gilayong napahigayon og lalom nga imbestigasyon.
Apan bisan paman sa paghatag og katin-awan sa mga otoridad gihagit gihapon kini ni FPRRD si PBBM nga magpa drug-test inay nga magsige na lamang og likay.
Matud pa ni Beleno nga posibleng ang rason ni PBBM sa wala niini pagubag sa hagit mao ang kamatuoran nga kung mosugot siya nga moundergo sa nahisgutang test, magpadayon ang demand sa katawhan ug magpabilin lamang nga way kasulbaran ang maong problema.
Alayon niini, gihagit karon ni Beleno ang katawhan nga mahimong mabinantayon sa tanang makita sa social media aron nga malikay na sa mga sayop nga impormasyon nga posibleng makahatag og kahadlok nagdto sa katawhan.
