DAVAO CITY – Dul-an sa dos milyones ka pesos ang gihatud nga damyos sa nahitabong sunog pasado alas dose kagahapon sa udto sa usa ka auto spare parts nga nahimutang sa Delos Remedios St. Toril ning dakbayan sa Davao.
Matud pa sa nanag-iya sa tindahan nga si Lester Lamparas, 35 anyos, minyo ug residente sa Toril ning dakbayan, gibiyaan una nila ang ilang tindahan aron maniudto ug ila sumala pa kini nga gisirad-an gumikan kay walay mobantay dihang nakadawat na lamang sila ug tawag gikan sa kasikbit nga tindahan nga nagkanayong gilamoy sa kalayo ang establisyemento.
Dali sumala pa nga nanawag ang nahisgutan sa Toril Fire Station nga paspas sab nga miresponde hinungdan nga milungtad lamang ug kinse minutos ang sunog ug wala na kini mikanit sa uban pa nga mga tindahan sa lugar.
Mikabat sab sa kapin 3 milyones ang nasalbar nga mga paninda kalakip na sa kasikbit niini nga tindahan. Matud pa kang Fire Investigation Fire Officer 2 Erwin Alcosaba, short circuit sa kuryente ang tinubdan sa sunog ug dali kini nga miulbo gumikan kay adunay grasa ug mga gamit sa sakyanan ang anaa sa sulod sa tindahan.
