Padayon nga giberipika karon ang mga report nga napatay sa usa ka bag-ong airstrike ang gideklara pa lamang nga interim Supreme Leader sa Iran nga si Ayatollah Alireza Arafi, pipila ka minutos lamang human sa pormal nga pagtudlo niini sa pwesto.
Sa wala pa kini gituboy, pormal nga gitakda si Ayatollah Arafi nga miyembro sa temporary Leadership Council sa Iran pagkahuman sa pagkamatay ni Supreme Leader Ayatollah Ali Khamenei tungod sa serye sa US-Israeli strikes.
Sumala sa taho sa state media sa wala pa ang bag-ong giingong pag-atake, makig-uban unta si Arafi kang Masoud Pezeshkian ug Gholamhossein Mohseni Ejei aron temporaryong huptan ang mga katungdanan sa Supreme Leader samtang wala pa nakapili og kapuli ang Assembly of Experts.
Tungod sa pagkamatay ni Khamenei, nagdeklara ang nasud og 40-ka adlaw nga pagbangutan.
Nagkahiusa ug nagkalain-lain ang reaksyon sa Tehran diin daghan ang nagsubo ug misinggit og protesta batok sa Amerika ug Israel, samtang adunay taho usab nga hilom nga pagsaulog sa pipila ka residente.
Bisan pa sa mga report kabahin sa giingong pagkamatay ni Arafi, hugot nga gikondena ni President Pezeshkian ang pagpatay sa ilahang Supreme Leader ug gitawag kini nga declaration of war against Muslims.
Gipaabot pa karon ang opisyal nga kumpirmasyon gikan sa kagamhanan sa Iran ug state media kabahin sa tinuod nga nahitabo kang Ayatollah Arafi human sa gikataho nga airstrike.
