Gikumpirma ni Russian President Vladimir Putin nga sila ang responsable sa pagpahagsa sa Azerbaijani jetliner niadtong Disyembre nga miresulta sa kamatayon sa 38 ka mga tawo.
Matod pa ni Putin, nagpalupad ang ilang air defense system aron targeton ang usa ka Ukrainian drone, apan nibuto kini duol sa eroplano sa Azerbaijani Airlines, hinungdan sa insidente.
Ang maong eroplano migikan sa Baku, Azerbaijan ug naka-schedule nga motugpa unta sa Chechnya, Russia niadtong Disyembre 25, 2024, sa dihang nahitabo ang trahedya.
Gibutyag ni Putin ang iyang pag-angkon sa usa ka miting uban ni Azerbaijan President Ilham Aliyev nga gipahigayon sa Dushanbe, Tajikistan.
Gisiguro ni Putin nga silotan ang responsable sa maong insidente ug maghatag usab og tabang sa mga biktima ug ilang pamilya.
