DAVAO CITY Suportado sa Inter-agency Anti-Arson Task Force (IATF) ang giduso nga ordinansa diin mandato ang mga establisyemento nga magpahimutang ug photoluminescent o glow-in-the-dark signages sa emergency exits.
Matud pa kang BFP-IATF spokesperson Fire Superintendent Jerry Candido, maayo ang maong lakang aron nga masuportahan gayud ang probisyon sa fire code.
Mahinungdanon sumala pa ikonsidera ang maong sugyot sa mga building occupants gumikan kay kini ang magsilbing giya kung asa moadto panahon sa emerhensiya ilabi na kung adunay sunog o kung aduna ma-trap nga mga biktima.
Dugang sa opisyal nga ang mga salog kinahanglan sab nga butangan ug glow-in-the-dark signages ingon man ang mga intersections sa corridors ug mga agi-anan, mga hagdanan ug exit doors aron nga dali na lamang ang paggawas sa gambalay.
Kahinumduman nga giduso ni Davao City Councilor Maria Belen Acosta, ang pagpahimutang ug mga glow-in-the-dark signages aron nga dili na subling mahitabo ang sunog nga milamoy sa NCCC mall nga mikalas ug kapin 30 ka mga kinabuhi.
