DAVAO CITY – Aprubado na sa City Council sa ikatulo ug panapos nga pagbasa ang pag-amyenda sa Davao City Traffic Code nga nagdili sa mga nanag-iya ug establisyemento nga magpahimutang ug temporaryo o permanente nga mga signage aron ipahibalo nga exclusive parking lamang nila ang lugar alang sa ilang mga customers bisan nga anaa kini sa mga dalan nga iya sa gobyerno.
Matud pa kang konsehal Conrado Baluran, nga kalakip sa gi-amyendahan nga ordinansa mao ang pagdili sa pagpahimutang ug mga flower pot, bangko, lamesa ug uban pa.
Una ng gibutyag sa Davao City Transportation and Traffic Management Office (CTTMO) atol sa sesyon nga malisdan sila sa pagpatuman sa traffic code nga nagdili sa mga illegal signboards sa kadalanan gumikan kay mangita pa gihapon ug pamaagi ang mga establsyemento aron aduna silay ibabag.
Sa mga makalapas sa ordinansa, pahamtangan ug maximum penalty nga P5,000 alang sa first offense ug mamahimong modoble pa kini sa second ug third offenses.
Samtang pasakahan ug kaso ang makalapas sa ordinansa sa ika-upat nga offense.
